Заплюшчы вочы, прыслухайся. I ты пачуеш матулін голас. Ён жыве ў табе, такі знаёмы, родны. Яго не зблытаеш ні з якім іншым голасам. Нават калі станеш дарослым, заўсёды будзеш памятаць матулін голас, матуліны вочы, матуліны рукі.

Падчас міжнароднага жаночага дня  ў нашай беларускай нядзельнай школе “Вясёлка” прайшоў адкрыты ўрок – свята “Разам з мамай”. Мэта ўрока – выхоўваць павагу, пашану да маці; развіваць эстэтычны густ, адчуванне прыгожага ў паэзіі, музыцы, пачуццях. На ўрок вучні запрасілі сваіх мам.

Дзеці чыталі вершы на беларускай мове, прысвечаныя мамам, удзельнічалі ў віктарынах. Мамы спявалі калыханкі. Разам адгадвалі песні і спявалі іх, выконвалі практычнае заданне “Прыгатуй боршч і плоў”. Усім спадабаліся гульні: “Матчыны рукі”, “Пазнай па голасу”, “Зразумей мяне” і фанты.

 Арганізавалі творчую майстэрню “Кветачка для мамы”. Дзеці разам з дарослымі зрабілі з каляровай паперы прыгожыя цюльпаны ў падарунак мамам.

А потым усе разам сабраліся за салодкім сталом.

Матэрыял падрыхтавала

Людміла Сінякова