Пачатак верасня 2018 года для беларускай дыяспары Даўгаўпілса адзначыўся грандыёзным святам. Беларускае культурна-асветніцкае таварыства «Уздым» весела і з размахам адзначыла сваё 25-годдзе. У суботу, 9 верасня 2018 года, у канцэртнай зале Дома Адзінства ў фармаце «Блакітнага агеньчыка» прайшло ўшанаванне адной са старэйшых і буйнейшых беларускіх арганізацый Даўгаўпілса.

У прыгранічным з Беларуссю Даўгаўпілсе пражывае каля 8 000 беларусаў. У пачатку 1990-х, на хвалі ўздыму нацыянальнай самасвядомасці, каб захаваць сваю нацыянальную самаідэнтычнасьць, беларусы пачалі пошук беларускіх каранёў на латгальскай зямлі. І ў выніку гэтага ўзнікла Беларускае культурна-асветніцкае таварыства «Уздым», афіцыйна зарэгістраванае ў Міністэрстве юстыцыі Латвіі 6 ліпеня 1993 года як грамадская арганізацыя. Менавіта гэтая дата з'яўляецца афіцыйным днём нараджэння таварыства «Уздым», якому ў гэтым годзе споўнілася 25 гадоў.

Беларускае таварыства «Уздым» - яркая кветка ў вянку славянскіх народаў Даўгаўпілса, адна з самых актыўных і дзейных арганізацый сярод шматлікіх нацыянальных таварыстваў горада. Мэта дзейнасці таварыства – спрыянне нацыянальнаму адраджэнню, захаванню беларускай культуры, мовы, гістарычнай памяці, дапамагаць аб'яднанню беларусаў, якія па розных прычынах і ў розны час пераехалі жыць у Латвію, падтрымка сувязяў з Беларуссю. Таварыства праводзіць шматлікія мерапрыемствы, накіраваныя на папулярызацыю беларускіх традыцый, народных святаў, беларускай мовы, прымае актыўны ўдзел у культурных мерапрыемствах, якія праводзяцца ў Латвіі і Беларусі, чым спрыяе актыўнаму аб'яднанню беларусаў, пазітыўнаму міжкультурнаму дыялогу і працэсу інтэграцыі ў разнастайнасці культурнага жыцця шматнацыянальнага Даўгаўпілса.

Ля вытокаў стварэння грамадства стаяла вялікая ініцыятыўная група, адзінаццаць з якіх сталі яе заснавальнікамі: Канстанцін Капуста, Станіслаў Валодзька, Зінаіда Сіліня, Іосіф Рэут, Мікалай Навуменка, Ларыса Ярашэвіч, Яўгенія Гуляева, Яўген Шабуцкі, Зянон Буры, Мікалай Паўловіч, Аляксандр Карнацэвіч. Крок за крокам усе гэтыя гады «Уздым» пісаў сваю гісторыю; шмат сіл да гэтага прыклалі таксама Барыс Іваноў, Таццяна Бучэль (аўтар «Летапісу» аб беларускім грамадстве), Мікалай і Вольга Паўловічы, Настасся Сазанкова і многія іншыя.

Як кажуць у народзе, дзіця мала нарадзіць, яго трэба падняць на ногі і выхаваць. Таму ў розныя гады ў дзейнасці беларускага таварыства прымалі актыўны ўдзел самыя розныя людзі, мяняўся склад Праўлення, старшынямі якога ў свой час былі: Мікалай Паўловіч, Станіслаў Валодзька, Таццяна Бучэль, Барыс Іваноў, Валерый Амбросаў, Людміла Сінякова. Зараз Праўленне ўзначальвае Жанна Раманоўская. Рады членаў «Уздыма» увесь час папаўняюцца і кожны, хто прыйшоў у аб’яднанне - гэта талент, гэта самабытнасць, гэта захопленыя і творчыя людзі, якія шмат свайго асабістага часу, душэўнага цяпла і таленту аддаюць на карысць грамадства.

І вось такія неабыякавыя і актыўныя людзі сабраліся ва ўтульнай зале Дома Адзінства, за прыгожа аформленымі і стыльна накрытымі столікамі, каб усім разам адзначыць выдатны юбілей – 25-годдзе сваёй арганізацыі. Адкрылі ўрачыстае мерапрыемства выхаванцы беларускай нядзельнай школы «Вясёлка», якія выканалі танец «Беларусь мая сінявокая».

Раздзяліць радасць свята «Уздыма» прыйшлі: старшыня Даўгаўпілскай гарадской думы Рыхард Эйгім, намеснік старшыні думы Яніс Дукшынскі, старшыня Даўгаўпілскай краявой думы Яніна Ялінская, кіраўнік Упраўлення культуры г.Даўгаўпілса Элеанора Кляшчынская. У ліку высокіх гасцей былі консул Генеральнага консульства Рэспублікі Беларусь у Даўгаўпілсе Мікалай Раманкевіч, консул-саветнік Генеральнага консульства Расійскай Федэрацыі Наталля Пуставалова, старшыня Саюза беларусаў Латвіі Валянціна Піскунова, член праўлення Саюза беларусаў Латвіі і старшыня рыжскага беларускага таварыства «Прамень» Алена Лазарава.

У якасці ганаровых гасцей на сцэну былі запрошаныя ўсе заснавальнікі таварыства «Уздым», кожны з якіх выступіў з віншавальным словам і атрымаў у знак падзякі кветкі і членскія білеты. Паэт Станіслаў Валодзька прачытаў сваё прысвячэнне «Уздыму», а Зінаіда Сіліня выканала акапэльна песню «Шэры конь».

Ну, а якое ж свята ў беларусаў абыходзіцца без гасцей? А іх на свяце было вельмі шмат, таму што дзякуючы шыраце душы, дабрыні, спагадлівасці і шчырасці ў беларусаў шмат сяброў і партнёраў як па ўсёй Латвіі, так і за мяжой. З урачыстымі віншаваннямі на сцэну выходзілі нашы сябры з Мінска і Браслава, з Вісагінаса (Літва), прадстаўнікі беларускіх таварыстваў Дагды, Рэзэкнэ, Ліван, Прэйлі.

З юбілеем «Уздым» павіншавалі даўгаўпілскія Цэнтры латышскай, рускай, польскай і беларускай культур; латышскае, украінскае, польскае, літоўскае, яўрэйскае, татарскае нацыянальна-культурныя таварыствы; паэты і мастакі Даўгаўпілса; калектывы Цэнтра беларускай культуры: «Купалінка», «Спадчына», «Лянок», «Пралескі», «Паўлінка». Пісьмовыя віншаванні прыйшлі ад аб’яднання беларусаў свету «Бацькаўшчына» (Мінск), Елгаўскага беларускага таварыства «Лянок» і рыжскага беларускага таварыства «Світанак»; беларускага грамадства «Сябры» з Нарвы (Эстонія).

А дзе ў беларусаў свята, там, вядома ж, весялосць, песні, танцы. І ўсё гэта ў вышэйшай ступені бліскуча забяспечыў ансамбль народнай музыкі і песні «Траецкія музыкі» з г.Барысава (Беларусь). Музыканты так задорна, жартаўліва, з куражом выконвалі беларускія народныя песні, што ніхто не змог усядзець на месцы, амаль усе шматлікія госці вечара пускаліся ў скокі. Чароўныя гукі беларускай дуды, цымбал, скрыпкі, гітары, баяна і іншых музычных інструментаў у руках таленавітых музыкаў у спалучэнні з беларускімі танцамі, прыказкамі-пажаданнямі ад мастацкага кіраўніка ансамбля Святланы Вашкевіч стваралі непаўторную святочную атмасферу. Музычныя ноткі дадалі таксама госці з Вісагінаса, творчыя калектывы Цэнтра беларускай культуры, салісты, барды.

Юбілейная імпрэза таварыства «Уздым» прайшла ў рамках восеньскіх Дзён беларускай культуры ў Латвіі, прысвечаных 100-годдзю Латвійскай Рэспублікі і 15-годдзю Саюза беларусаў Латвіі (СБЛ), у які ўваходзіць і «Уздым». Таму прэзентацыя вышытага беларускага ручніка СБЛ і тэматычная газета «Прамень», а таксама перасовачная літаратурная выстава з Дзяржаўнага музея гісторыі беларускай літаратуры «Жыццё ў Слове» (Мінск) і выстава беларускіх рамесных вырабаў (Браслаў, Беларусь) сталі лагічным дадаткам да яркага і маштабнага свята ў Даўгаўпілсе.

Мерапрыемства атрымалася на славу, за што таварыства «Уздым» сардэчна дзякуе Цэнтр беларускай культуры і ўсіх сваіх шчырых сяброў, партнёраў, памочнікаў і мецэнатаў.

Інфармацыя падрыхтавана:
Член таварыства «Уздым» Марыя Памецька